ڪہا تھا نا

کہا تھا نا کہ آنکھوں کی

یہ اذنِ گفتگو اِک دن

پسِ دیوار گلیوں میں

ذلیل و خوار کردے گی

کہا تھا نا کہ رُتبے میں

یہاں ہر خوبرو تجھ سے

معزّز بھی ہے سچا بھی

اور اُن کا قد بھی اونچا ہے

کہا تھا نا امیدوں سے

خود ہی اک فاصلہ رکھنا

اور اپنے درد کی ہانڈی

کو دھیمی آنچ پر رکھنا

کہا تھا نا مقدّر کے

گھنے سایوں کی سازش سے

یہ آنکھوں کے دیے آخر

اچانک جِلملائیں گے

کہا تھا نا یہ آنکھیں ہی

زبانِ حال سے اک دن

صدائے العتش دے کر

خود ہی خود بھیگ جائیں گی

کہا تھا نا کہ آنکھیں ہی

کہیں گی یہ متانت سے

تمہاری مسکراہٹ سے

اور قدموں کی آہٹ سے

محبت کی حِلاوت سے

اور جزبوں کی تمازت سے

ہماری جوت باقی ہے

اور امید قائم ہے

کہا تھا نا کہ آنکھیں ہی

تمھیں اخبار کردیں گی

حدودِ ذات سے باہر

گھروندہ اِک بنائیں گی

کہا تھا نا بتائیں گی

زمانے کے خداؤں سے

دلوں کا میل دھو ڈالو

زباں میں چاشنی بھرلو

تعصب اور نخوت کا

یہ چولہ پھینک کر آؤو

محبت اور اخوت کی

نئی اِک داستاں لکھو

انا کے اس ہمالہ کو

سمندر کی نذر کرلو

اور اپنی بے ثباتی پر

گھڑی بھر غور کرڈالو

کہا تھا نا کہ آخرکار

تِری حسرت بھری نظریں

سِلے ہونٹوں کی خاموشی

پھٹے کپڑوں کی محرومی

یہ پاؤں کے سبھی چھالے

تمہاری داستاں لے کر

ڈھنڈورہ پیٹ آئیں گے۔

او

طارق احمد طارق